Santiago J Paricio Martín (Zaragoza, 1985) ye un lingüista y escritor aragonés, licenciau en Filología Hispánica por a Universidad de Zaragoza y estudiant de Filologia Catalana por a Universitat Oberta de Catalunya.

Fillo de pai de Monzón y mai de Santed, ha viviu en diferents lugars, en primeras en Catalunya, y dimpués en Aragón, cosa que se reflexa en buena parte en a suya novela y en a suya vida plurilingüe.

Como investigador, ha treballau en qualques variedatz de l’aragonés como o ribagorzano, chistavín, l’aragonés d’o somontano, y l’aragonés medieval de Zaragoza, y ha feito parte de prochectos d’investigación financiaus por o Gobierno de Aragón, a Unión Europea y o Ministerio de Educación en colaboración con a Universidad de Zaragoza. Ye autor y coautor de más de 20 articlos de lingüistica y literatura, con o tema principal de l’aragonés, o multilingüismo y as nuevas tecnolochías; ha charrau en diferents simposios y seminarios sobre a luenga aragonesa, y ha feito parte como articulista, corrector y traductor de bellas publicacions y revistas de divulgación en aragonés como O Espiello y Ambista. A más, ha estau galardonau con bell premio literario y ha escrito, chunto con Rocío Montañés, un chicot libro de cuentos ta ninos titulau O reino de l’augua (O Limaco Edizions, 2008).

Finalment, o suyo treballo en a revitalización y protección d’a diversidat lingüistica no nomás se centra en a investigación y producción literaria, sino tamién en o voluntariau, fendo de coordinador y docent en o grupo d’amostranza de l’Asociación Cultural Nogará-Religada, que en fa parte dende 2005.

Con o present libro, l’autor enceta una saga de novelas d’aventuras, de viaches y de misterio que tiene como filo conductor a reflexión sobre o mundo multilingüe en que se desenvolican as sociedatz d’o present y d’o futuro a venir: os fillos d’as luengas.

Ver Decreto de concesión del premio.