María ye una choben plena de suenios que conox a Miguel, un montañés que ha abiu de marchar d’o suyo lugar. Chuntos se capuzan en os embordiellos politicos d’a Zaragoza d’os años trenta d’o sieglo pasau. A guerra les amostrará a suya cruel cara, furtando-les as suyas ilusions.

Con En l’altro canto d’a güega Rubén Ramos (Zaragoza, 1972) ganó o premio Arnal Cavero de creyazión literaria en aragonés que atorga o Gobierno de Aragón. En luenga aragonesa tamién ha publicau Bidas crebazadas (2007), premio Arnal Cavero 2006.

Rubén Ramos ye autor d’un zelemín d’articlos en aragonés y sobre l’aragonés en diferents meyos de comunicazión.

En castellano, chunto con l’istoriador Carlos Serrano, ye coautor de El aragonesismo en la transición I y II, editaus per o Rolde de Estudios Aragoneses y a Fundación Gaspar Torrente, en 2002 y 2003.

Ye miembro de l’Asoziazión Cultural Nogará-Religada.